Sughra ne likha khat me aye jan e haya Akbar
SuntiN hooN ke ghar Tumne jangal meiN basaya hai
Pardes meiN yeh tumko kya soojhi bhala Akbar
Sughra ne likha khat me aye jan e haya Akbar

Har roz Bahen uth kar hujre ko sajati hai
Maajai se ab aa kar hona na khafa Akbar
Sughra ne likha khat me aye jan e haya Akbar

Aana hai to aa jaao, lene ko mujhe Bhaiyya
Kya haal likhoN tumko ab iske siwa Akbar
Sughra ne likha khat me aye jan e haya Akbar

Beemar bahen jaano kuch dair ki mehmaan hai
Gar dair se aaoge to paao ge kya Akbar
Sughra ne likha khat me aye jan e haya Akbar

PoocheN jo Chacha aa kar kuch haal mera Tum se
Kuch aage Sakeena ke kahna na zara Akbar
Sughra ne likha khat me aye jan e haya Akbar

Amma jo tadap kar kuch uftaad meri poocheN
Achchi hai, yah hi kahna, samjha ke zara Akbar
Sughra ne likha khat me aye jan e haya Akbar

Yeh Maa ka kaleja hai, phat jaye ga gham sah kar
Kah do ge agar unse kuch iske siwa Akbar
Sughra ne likha khat me aye jan e haya Akbar

Gahwaare se iss khat ko Sashmaah agar deikhe
Moo choom ke Asghar ka phir dena dua Akbar
Sughra ne likha khat me aye jan e haya Akbar

Lillah taras kha kar Baba ko bata dena
Kuch roz ki mehman hooN, Sughra ne likha Akbar
Sughra ne likha khat me aye jan e haya Akbar

Yeh likhte hi ai Nasir*, ghash kha ke giri Sughra
Ai Jaan e wafa Akbar, Ai Jaan e haya Akbar
Sughra ne likha khat me aye jan e haya Akbar