Fatema sughra yeh kehti thiN idhar aa qasid
Paas baba ke yeh nama mera le ja qasid

Reham kha kar meri beemari-o-tanhai par
Wasta tujhko payambar ka khudara qasid

Karbala jate hi tu khidmate Sheh mai jana
Kehna tasleem mera haal sunana qasid

Baba bardhta hai maraz jitni dawa karti huN
Khana pani bhi hua tark yeh kehna qasid

Chacha Abbas se kehna meri janib se salam
Aap bhi bhul gaye karna yeh shikwa qasid

Bandagi kehna tu shehzada-e-akbar se meri
Dast basta mera dukh dard sunana qasid

Noujawani hai mere bhai ki nazuk hai mizaj
Harf shikwe ka zabaN par bhi na lana qasid

Aap farma gaye thay aaouNga lene ko tumhe
Yaad dilwana woh bhula hua wada qasid

Bhai qasim ko meri simt se kehna tasleem
Neg lena jo bana dekhna dulha qasid

Kehna kya bhul gaye saniye akbar mujh ko
Sehra ho tumko mubarak yahi kehna qasid

Bhai jo aun-o-muhammad haiN phuphizaad mere
Unse kehna ke dua deti hai Sughra qasid

Kheriyat puchna phir Nanhe Musafir ki mere
Pyaar krna use godi mai khilana qasid

Apni Hamsheer ki ulfat ko bhulaya Bhaiyya
Kehna godi ki tarha khali hai jhula qasid

Kehna Maa-Behno ko Phuphiyo ko meri ja ke salam
Ek muddat hui sab chhut gaya kunba qasid

Algharaz reham use aa gaya sun kar rudaad
Karbala le ke Chala namaye sughra qasid

Lut chuka tha chamane Fatema Aashur ke din
Karbala haye ajab waqt mai pohNcha qasid

Asr ka waqt tha aur lakhoN mein tanha thay Hussain
Jhuk ke tasleem ki aur saamne aaya qasid

Sheh ne farmaya ke kya naam hai qyun aaya hai
Nama Sughra ka yeh laya hun yeh bola qasid

Kehna Sughra se ke sab mar gaye tanha hain Hussain
Tashnalab qatl huye paas tha dariya qasid

Main bhi kuch der ka mehmaN hun kya likhuN jawab
Haal ab ja ke zabaani mera kehna qasid

Laye phir qasid e Sughra ko labe nehar Hussain
Bole yeh hai mere Abbas ka lasha qasid

Phir kaha Bhai ke lashe se mukhatib ho kar
Kuch kaho puchta hai haal tumhara qasid

Laye phir usko JawaN Laal ki maiyyat par Hussain
Bole tukrde hai mera gham se kaleja qasid

Phir kaha maiyyate Akbar se ke sun lo Beta
HaaN zara ghour se pardh nama e Sughra qasid

Algharaz le gaye eik eik ki maiyyaat par Hussain
Sab ki laashoN se hi rota hua uttha qasid

Nama Sughra ka haram ko jo sunaya sheh ne
Hashr kheme mai hua dar pe tha rota qasid

Khaak sar par thi aur chaak garebaN Zamin*
Sheh ne rukhsat kia rota hua palta qasid

Fatema sughra yeh kehti thiN idhar aa qasid
Paas baba ke yeh nama mera le ja qasid