paaNchviN maahe Muharram ki hui jab momeneeN
Karbala meiN fauj leikar aa gaya Shimr’e laeeN

kya sitamgar thEy ke nizd’e khaimaey Ahle Haram
ghoaRe daptaate huEy aate thEy paiham ahle keeN

woh chamak naizoN ki aur jhankaar talwaaroN ki aah
sUnn ke bachche khauf se girte thEy ba’laaey zameeN

ShAh se jab Zainab ne poocha yeh ke ab aaya hai kaun
sAr jhuka kar aap yeh boale, hai yehi Shimre laeeN

jaise hi naame laeeN ShAh ki zabaaN par aa gaya
hazrate ainab hueeN, hadd se siwa andoah_geeN

ShAh ne farmaaya, bahen kyuN iss qadar hai izteraab
yaas se kahne lageeN yuN binte Khatmul MursaleeN

khudd suna hai maiN ne naana ko yeh farmaate huEy
qaatile Shappeer hoaga, eik din Shimre laeeN

aap hi farmaaiye phir kyuN na hooN maiN be_hawaas
Panjetan meiN bAs faqat haiN aap hi ya Shaahe deeN

sUnn ke yeh ShAh ne kaha, sabr o raza se kaam lo
maslahat hai Haq ki, kyuN ho iss qadar andoah_geeN

ya Hussain ibne Ali sadqaa Rasool Allah ka
Karbala meiN Fikr* ki ho qabr rauzey ke qareeN