Noha

Nikla uffaq pa yeh jo Moharram ka chand hai
Ulfat hai hum ko jis se yeh us gham ka chand hai
Nikla uffaq pa yeh jo Moharram ka chand hai

Abbas aur Husssain ke matam ka chand hai
Zainab Tumhare zakhmoN ke Marham ka chand hai
Nikla uffaq pa yeh jo Moharram ka chand hai

Ashk e Aza haiN chhaye hue abr ki tarhan
Ai mominoN yeh kaun se mausam ka chand hai
Nikla uffaq pa yeh jo Moharram ka chand hai

Suraj hai ai Hussain tere Azm ka gawah
Shahid yeh tere sajda e mohkam ka chaand hai
Nikla uffaq pa yeh jo Moharram ka chand hai

Beparda tum ko dekh ke ai Zainab e HazeeN
Sharminda aaj tak yeh yeh moharram ka chand hai
Nikla uffaq pa yeh jo Moharram ka chand hai

TanhaiyaN bhi kah uthiN Aabid ko Dekh kar
Tanha Bohut Imaam e Do Aalam ka chand hai
Nikla uffaq pa yeh jo Moharram ka chand hai

TeeroN ko badh ke rok le, Ai khaak e Karbala
HaatoN pa Sheh ke Bano e Purgham ka chand hai
Nikla uffaq pa yeh jo Moharram ka chand hai

Phaile gi jis se hashr mein bakshis ki chandni
Yeh chand to Adeel* usi gham ka chaand hai
Nikla uffaq pa yeh jo Moharram ka chand hai

Leave a Reply

Your email address will not be published. Required fields are marked *