Jo shaamil e bazme ghame Shabbir nahi hai
haasil usay emaan ki jageer nahi hai

qurbaniye Shabbir hata do to ye islam
wo khwab hai jis khwab ki tameer nahi hai
jo shaamil e bazme….

be hubbe Ali sajde hai yun meri nazar may
goya to hai Quran ki tafseer nahi hai
jo shaamil e bazme….

bemaar ke paon ki taraf dekhne wa lon
islam ka langar hai ye zanjeer nahi hai
jo shaamil e bazme….

ay koofiyo be-parda hai ye Hurmate islam
be-parda yahan Zainab e dilgeer nahi hai
jo shaamil e bazme….

Bano ne ye ashoor ki shab khwab may dekha
jhoolay may mera Asghare baysheer nahi hai
jo shaamil e bazme….

Asghar ki Shahadat ne kiya zulm ko ruswa
ab tarkashe aada may koi teer nahi hai
jo shaamil e bazme….

jisme na rawani ho na ho shaukate alfaaz
Mehshar* wo tere khaak ki tehreer nahi hai
jo shaamil e bazme….