tasht’e pUrkhooN mein nazar jab Shaah ka sAr aa gaya
sAb pukaar’e lo shafaq meiN, mehr’e anwar aa gaya
Shimr se paani talab karte hi karte waqte asr
baRh ke pyaase ke gAley tak aab’e khanjar aa gaya
bahr’e khooN meiN gharq hoakar haaEy Aashoore ke din
tashna kaamoN ka safeena, nizd’e Kausar aa gaya
lEy chalEy sAr naNgEy jab, ahl’e Haram ko ashqiya
ban-key chaadar khud ghubaare dasht sAr par aa gaya
zoaf bola Aabide Beemaar kholo ghash se aaNkh
beiRiyaaN leikar qareeN jis dUm sitamgar aa gaya
ShAh ne deikha yaas ki nazron se suuey aasmaaN
halq ke nazdeek jab qaatil ka khanjar aa gaya
deikhne waalEy yeh samjhEy, hai shafaq meiN aaftaab
khoon’e farq’e Shaah jab cHehre pa bahkar aa gaya
dard Laila ke kaleije meiN utha ek daf’atan
jAb kabhi lUb par kisi ke naam’e Akbar aa gaya
zindagi jo Fikr* ki shauq’e ziyaarat meiN kati
jaaNkani ke waqt khud, Maulaaey Qambar aa gaya