Sughra ka tha yeh bayan, Nanhe Musafir mere
Kar diya soona makan, Nanhe Musafir mere

Chhain nahi hai mujhe, jabse gaye chod ke
Karti huN har dum fugaN, Nanhe Musafir mere

Tum par maiN qurbaan huN, aao to hoye sukoon
Gham se ab hai dil tapa, Nanhe Musafir mere

Dil na thehra jab zara, naame meiN Sheh ko likha
Kaise haiN Shah e Huda, Nanhe Musafir mere

Jhoole ki khaali jagah, dekh ke aey Dilruba
GirtiN haiN ab bijliyaN, Nanhe Musafir mere

Chaand si surat Teri, aankhon se ojhal hui
MaiN rahi karti fugaN, Nanhe Musafir mere

Tumse hai haajat Padar, likhna yeh mujhko khabar
BhooleN haiN Mujhko wahaN, Nanhe Musafir mere

Choomna uska gala, keh ke yeh Shah e Huda
Marti hai Khwahar yahaN, Nanhe Musafir mere

Badh gayi mannat Teri, kuch na khabar yeh hui
Utri hai kab hansliya, Nanhe Musafir mere

Dekh kar Shah e Zama’n, naame ko bole Behen
Karti hai Sughra bayan, Nanhe Musafir mere

Likha hai jinko salam, deta hun jaakar payam
BhejeN haiN jaakar jahaN, Nanhe Musafir mere

Turbate Besheer par, Sheh ne kaha peet kar
Sughra ka sun lo bayan, Nanhe Musafir mere

Kis tarah choomu gala, teer hai utra hua
Aey mere aaram o jaaN, Nanhe Musafir mere

Bhej du kyukar watan tumko mai Guncha Dahan
Phir gaya Mujh se jahan, Nanhe Musafir mere

Keh ke yeh Hashim* uthe turbate Besheer se
Tum pe khuda ki amaa’n, Nanhe Musafir mere