khooN se tAr kAb eik tanha ShAh ki peishaani hui
Panjetan ki aaj goya rUnn meiN qurbaani hui

do_paher mein, sAb azeezo aqruba maarey gaEy
yuN Hussain Ibne Ali ki, khaana weeraani hui

jAb gaya duniya se sooey khuld mehmaan’e Hussain
khoob hooraan’e jinaaN meiN Hurr ki mehmaani hui

ho chuka ta’araaj jAb duniya meiN baagh’e Mustafa
tAb Yzeed’e ru_siyah ko bhi pasheimaani hui

zulm se Shimr’e bUd imaaN ke, rahEy Koofa meiN aah
Aabid’e muztar ki zakhmi, pusht’e nooraani hui

roaz pard’e meiN shafaq ke, cHarkh roata hai lahoo
Karbala mein jabse shashmaahe ki qurbaani hui

Akbaro Abbaso Qasim, bhi huEy rUn meiN shaheed
aur rangeen khoon se, ShAh ki bhi peishaani hui

ashqiya ke asp tAk peetey rahEy darya se aab
aur baraaey Shaah’e bahro bAr, nigehbaani hui

jis ke darwaaze pa rahta tha Malaaek ka hujoom
haaey kya baad’e Nabi uss ghar ki weeraani hui

Panjetan ka khaatema Shimr’e laeeN ne kar diya
asr ko sajd’e meiN khAm, jAb ShAh ki peishaani hui

jab kinaare naher ke shaane katEy Abbas ke
haath maujoN ne maley, darya meiN tughyaani hui

aaftaab aaya gahen mein, ho gai duniya siyaah
gUl hayaat’e Shaah ki jab, shamme nooraani hui

muztareb aey Fikr* kyuN ho, jaaogey Karb o Bala
hai agar qismat meiN, aur ta’aeed’e Rabbaani hui